Laat U Naam geheilig word

1849 Heilig is U Naam: Dit moet julle met diepe aandag uitspreek en elke dag voor oë hou, hoe oorweldigend die liefde is van Hom wat julle die lewe gee en hoe Sy Gees in julle is wanneer julle met Hom verbonde is. Julle moet tot Hom bid, met Hom in die diepste geloof praat, julle moet julle geloof aan Hom bely, deurdat julle Sy Naam noem, Hom aanroep in gebed, Hom loof en prys en Hom dank sonder ophou.

En as julle Sy Naam uitspreek, moet julle daarvan bewus wees dat julle met die hoogste en mees volmaakte Wese praat, Wie julle in die diepste verering moet nader, vraend om Sy liefde en barmhartigheid. En as julle bewus word van hoe klein en nietig julle is teenoor Hom, as julle in stille eerbied julle oë ophef na Hom en julle nou aan Hom toevertrou, dan sal julle Sy Naam in die diepste innigheid uitspreek, dit sal vir julle die mees gewyde beteken en deemoedig sal julle, julle knieë vir Hom buig. Want Jesus wil ook dat julle van Sy Naam melding maak, Hy wil dat julle Hom teenoor die wêreld bely.

Dit is nie voldoende dat julle Hom slegs in julle harte erken en maar stilweg met Hom in verbinding tree nie. Dit moet openlik in die openbaar bekend word, dat julle aan Hom wil behoort, gelowig en moedig moet julle Sy gewyde Naam uitspreek, julle liefde vir Hom bely en standhou teen alle versoekinge van buite af, om dit te verloën.

Die uitspreek van die goddelike Naam is uitermatig ryk aan seën, want Sy Naam berg krag in Homself en elkeen kan hierdie krag sy eie maak wanneer hy homself aan Hom toevertrou en in volledige innigheid Sy Naam noem, deurdat hy innig bid “Laat U Naam geheilig word”. Amen.