:::Nuweopenbaring::: Die Nuweopenbaring boeke

Hierdie is dan nou die werk wat aan julle belowe is soos deur MY skryfkneg opgeteken in die Johannes Evangelie Boek 11. Daar is voorwaar nog baie wat kortkom en dit sal nog aan julle bekend gemaak word in komende tye wanneer julle ryper en meer ontvanklik daarvoor is. EK is Die Almagtige, die Ewige en die Enigste. Wie na My kom uit liefde sál deur My met liefde opgeneem word. Koester geen vrees vir My nie, maar wees net vir My lief. Dit is al wat Ek wil hê. Jou liefde vir My sal jou reinig en skoon was sodat jy ‘n welgevallige hart sal hê wat deur MY gevul sal word. EK is die Alfa en die Omega, die Begin en die Einde. Niemand kan na My kom sonder die liefde nie. Die liefde is die Alfa en die Omega, want Ek is Liefde. EK is ook die Weg, die Waarheid en die Lewe. Niemand kom na Die Vader behalwe deur My nie. EK is die Vader en hoe kan julle na MY kom sonder Liefde? Soek na My in die diepte van jou hart. Soek na My in liefde en Ek sal jou met MY liefde vervul sodat jy vernuwe voor MY sal staan. Geen mens kan na MY kom sonder liefde nie. Dit moet julle nou onthou. Die liefde is die belangrikste en gaan ondersoek jou hart of daar genoeg liefde is vir MY en jou naaste. Dit is My Woorde aan julle voor My wederkoms, wat nie meer baie vêr is nie. Alles wat Ek aan julle sê, sê Ek met Liefde. Dit is die einde van hierdie boek. Daar sal nog baie openbarings aan julle gemaak word deur My skryfknegte sodat julle nie kan sê dat julle nie geweet het nie. Eet sodat julle versadig kan word en gereed kan wees vir die groot stryd wat voorlê. Maak julle oliekannetjies vol, want die nag gaan buitengewoon duister wees. Net EK kan julle oliekannetjies volmaak, maar julle moet kom vra daarvoor. Dink aan MY met al die liefde in jou hart en Ek sal jou vul.